Recevoir les nouveaux articles par Email

jeudi 27 décembre 2018

ՀՈԳԵՒՈՐ ՀՈՎԻՒԻ ՍՈՒՐԲ ԾՆՆԴԵԱՆ ՊԱՏԳԱՄԸ


Թանկագին իմ քոյրեր եւ եղբայրներ,
ահաւասիկ յաւերժի  գիրկը կ՚անցնէ աստուածային օրհնութիւններով յագեցած եւս մէկ տարի, եւ իր ետեւէն կը բանայ էջը 2019 թուականի, որ որպէս կեանքի ճերմակ մատեան կը բանանք՝ երազանքներով, նոր եռանդով, ապագայի հանդէպ լեցուն յոյսերով։ Եւ որքա՜ն մեծ է ողորմութիւնն Աստուծոյ, որ տարուայ առաջին էջին պիտի արձանագրենք մեր Փրկչի՝ Յիսուս Քրիստոսի Սուրբ Ծնունդը ու ստորագրենք.

«ՔՐԻՍՏՈՍ ԾՆԱՒ ԵՒ ՅԱՅՏՆԵՑԱՒ,  
ՁԵԶ ԵՒ ՄԵԶ ՄԵԾ ԱՒԵՏԻՍ»։

Երբ ծնաւ Յիսուս, սիրելինե՛ր, լուսեղէն հրեշտակները շտապեցան աւետիսով կիսուելու մարդոց հետ՝ ըսելով. «Մի՛ վախնաք... այսօր Փրկիչ մը ծնաւ ձեզի»։ Մեր առջեւ ընկած կեանքի 365 օրերը իրենց անորոշութեամբ, պայքարներով, փորձութիւններով ու մարտահրաւէրներով, իսկապէս, կրնան վախի ստուեր մը սահեցնել մեր սիրտերու մէջ։ Եւ, առհասարակ, վախի փուշերը, այսօր ամենուր արմատներ ձգած են, ուստի մարդս յաճախակի կ՚ապրի տագնապի, երկիւղի եւ վախի հոգեվիճակները։ Յիսուսի աստուածային Ծնունդով, սակայն, վախը իր հոգեւոր մունետիկներով ի սպառ կը չքանայ եւ կը փարատուի, « ... տագնապը կը տարագրուի, չարիքները կը չքանան, յուսահատութիւնը կը հալածուի ... » (Սբ. Գր. Նարեկացի), որովհետեւ մեզի կ՚ըսուի. «Մի՛ վախնաք, որովհետեւ այսօր Փրկիչ մը ծնաւ ձեզի»։ Մի՛ վախնաք, որովհետեւ նորածին Փրկչի համար անկարելի ոչինչ կայ, մի՛ վախնաք, Անոր սէրը աւելի մեծ է քան ձեր հոգսերը, մի՛ վախնաք, Յիսուսի բերած շնորհը պիտի ձեզ զօրացնէ, Անոր Խօսքը լոյս պիտի ըլլայ խաւարի ճանապարհներուն վրայ, «մի՛ վախնաք, այլ միայն հաւատացէ՛ք» (Մարկ. Ե 36)։

Հին տարուայ մայրամուտին եւ Ամանորի լուսաբացին, սիրելիներս, որպէս ժողո-վուրդ եւ եկեղեցի այս մտածումներով ու աղօթքներով մեր հոգեւոր աչքերը դարձնենք դէպի փայլուն Աստղը Բեթղեհեմի, եւ թող Աստուած պահապան ըլլայ ձեզ բոլորիդ։
Շնորհաւոր Ամանոր եւ Սուրբ Ծնունդ:
Օրհնութեամբ եւ հանապազ աղօթքով՝
  
Տ. Յուսիկ քհնյ. Սարգսեան
Հոգեւոր Հովիւ


https://www.jeaap.net/2018/12/message-de-noel-du-pretre-paroissial.html

Related Posts Plugin for WordPress, Blogger...