Recevoir les nouveaux articles par Email

mercredi 21 mars 2018

ԴՊՐՈՑԱՍԷՐԻ ՍԱՆԵՐԸ ԱՂՕԹԵՑԻՆ ՄԱՅՐ ԵԿԵՂԵՑՒՈՅ ՄԷՋ

Ինչպէս յայտնի է Մեծի Պահոց շրջանին իւրաքանչիւր չորեքշաբթի երեկոյեան 19.00-ին Փարիզի Սբ. Յովհաննէս Մկրտիչ Մայր Տաճարի մէջ կը կազմակերպուին Հսկումի ժամերգութիւններ, որու ընթացքին ներկայ հաւատացեալներ հնարաւորութիւն ունին անմիջական մասնակցելու եւ աղօթքներ ընթերցելու։

Մարտ 14ին աղօթական երեկոյին իրենց ծնողներու հետ միացած էին նաեւ Դպրոցասէր հայկական վարժարանի 6 սաներ` Մելինէն, Օշինը, Լեւոնը, Մկրտիչը, Կարապետը եւ Ժաքը։

Փոխ տնօրէն Պրն. Ազարեանի ուղեկցութեամբ պզտիկները դասընթացքէն վերջ հիւրընկալուեցան եկեղեցիի սրահին մէջ ուր Տէր Յուսիկ քհնյ. Սարգսեան բացատրեց պահքի եւ կատարուելիք ժամերգութեան կարեւորութիւնը, ինչպէս նաեւ պատասխանեց աշակերտներու առատ հարցերուն։ Աւելի ուշ համակ լրջութեամբ հետեւելով ծիսակատարութեանը` աշակերտներ շատ սահուն եւ հոգիով-սիրտով ընթերցեցին Ներսէս Շնորհալիի «Հաւատով Խոստովանիմ» աղօթքը։

Նշենք որ ժամերգութիւններուն իրենց պատուաւոր մասնակցութիւնը բերին նաեւ Հայ Կաթողիկէ եկեղեցւոյ հոգեւորոկաններ Գերշ. Տ. Յովսէփ Ծ. Վրդ. Քէլէկեան եւ Արժ. Պետրոս քհնյ. Համալեան։
Յաւարտ աղօթքի Տէր Յուսիկ ներկաներուն փոխանցեց Առաջնորդ Հօր` Գերշ. Տ. Վահան Եպս. Յովհաննէսեանի օրհնութիւնները եւ իր երախտագիտութիւնը յայտնեց աշակերտներուն, դպրոցի տնօրինութեան եւ ծնողներուն։ Լիայոյս ենք, որ այս փոքր նախաձեռնութիւնը տարիէ տարի պիտի վերածուի գեղեցիկ աւանդոյթի։

Յիշեցնենք, որ այս տարուայ Հսկումի վերջին ժամերգութիւնը տեղի կունենայ Փարիզի Մայր Տաճարի մէջ Մարտ 23ին` մասնակցութեամբ Փարիզի շրջանի բոլոր հոգեւորականներու եւ հաւատացեալ մեր հայորդիներու։

Սիրով կը սպասենք։




Related Posts Plugin for WordPress, Blogger...