Recevoir les nouveaux articles par Email

samedi 30 décembre 2017

Շնորհաւոր Ամանոր եւ Սբ. Ծնունդ - 2018

Սբ. Ծննդեան եւ 2018-րդ Ամանորի նախաշեմին կեցած ենք բոլորս: Արդեօք երբեք անդրադարձա՞ծ ենք, թէ ինչո՛ւ ամէն տարի կը տօնենք զայն։ Մեր Եկեղեցւոյ աղօթասէր հայրեր Սուրբ Ծնունդը կոչած են «խորհուրդ մեծ եւ սքանչելի»: Այդպէս անուանած են, քանզի անհնար է բացատրել, թէ ինչպէ՛ս անբաւելին` յաւիտենականն ու անսահմանը, խանձարուրի մէջ պարուրուեցաւ, ինչպէս Աստուծոյ Խօսքն ու Իմաստութիւնը՝ ծնաւ ոչ բանական կենդանիներու մսուրին մէջ:

Կը թուի թէ 21-րդ դարը մեզի կու տայ բոլոր պայմանները «խորհուրդ մեծ եւ սքանչելի»-ին ամբողջապէս հաղորդ դառնալու համար: Այդուհանդերձ, երբ խորութեամբ կը դիտարկենք մեր շուրջ զարգացող տօնական աշխուժութիւնը հասկնալի կը դառնայ, որ Սբ. Ծննդեան բուն տօնապատճառը չէ, որ կը տօնենք, այլ՝աշխարհայնացուած տօն մը, որը կը կրէ Սբ. Ծննդեան մասին փոքրիկ պատառիկ-յիշողութիւններ միայն: Եւ դեռ աւելին՝ այսօր կենսունակ են այնպիսի հոսանքներ, որոնք այդ ալ կուզեն ոտնահարել...
Հաւատացէ՛ք, սիրելինե՛րս, ուղեկորոյս է աշխարհը առանց Բեթղեհէմի աստղալոյսի: Առանց Քրիստոսի ապրուած կեանքն ու անոր շուրջ դարձող աշխարհը միշտ պիտի ըլլայ անհանդարտ, հոգսառատ, բարոյազուրկ... Հոգեւորի գիտակցումը եւ վերհանումը մեր մէջ միակ բանալիներ են մեր փրկութեան, մեր դարաւոր ու գեղեցկագոյն աւանդոյթները վերակենդանացնելու, մեր ազգային խնդիրները լուծման ճիշտ հունի մէջ դնելու համար։ Եւ Սուրբ Ծննդեան ամէնամեայ տօնախմբումը կու գայ մեզի յիշեցնելու հոգեւորի կարեւորութեան եւ յանուն մեր հոգիին՝ Աստուծոյ մեծ նուէրի մասին։

Սիրելի՛ եղբայրներ եւ քոյրեր ի Քրիստոս,
Սուրբ Ծննդեան այս հրաշալի տօնը հիանալի առիթ է վերակերտելու մեր ուխտն առ Աստուած եւ հոգեւոր խոկումով ու ինքնաքննութեամբ դիմաւորելու Աշխարհի Փրկչի մեծ, սքանչելի եւ խորհրդաւոր ծնունդը։ Աղօթքս է, որ Տէր Յիսուս Քրիստոսի Սուրբ Ծնունդը իրականութիւն դառնայ մեր սրտերուն մէջ, որոնք որպէս փարախ ու մսուր պիտի բանանք Անոր առջեւ։ Թող որ բեթղեհէմեան աստղը միշտ լուսաւորէ մեր ընթացքը այս աշխարհի ոլորաններուն մէջ: Կ՛աղօթեմ նաեւ ձեր զաւակներուն եւ ընտանիքներուն համար։ Թող որ Սբ. Ծննդեան փրկաբեր Աւետիսը առատ օրհնութիւններով լեցնէ ամէն հայու ընտանեկան յարկը ՝ պարգեւելով առողջ ու բարեբեր տարի: Շնորհաւոր Ամանոր եւ Սբ. Ծնունդ:

Քրիստոս Ծնաւ եւ Յայտնեցաւ
Մեզ եւ Ձեզ մեծ Աւետիս


Տ. Յուսիկ քհնյ. Սարգսեան
Հոգեւոր հովիւ Փարիզի եւ շրջակայքի ծուխի

http://www.jeaap.net/2017/12/2018.html

Related Posts Plugin for WordPress, Blogger...