Recevoir les nouveaux articles par Email

jeudi 13 juillet 2017

ԵՐԻՏԱՍԱՐԴՆԵՐԸ ԳՈՒՄԱՐԵՑԻՆ ՏԱՐԵԿԱՆ ԱՆԴԱՄԱԿԱՆ ԺՈՂՈՎԸ


Յունիսի 18ին Փարիզի «Սուրբ Յովհաննէս Մկրտիչ» երիտասարդաց միութեան  կողմէ գումարուեցաւ տարեկան անդամական 2րդ ժողովը, որուն ներկայ եղան միութեան անդամներէն աւելի քան քսան հոգի։
Ժողովը կը նախագահէր եկեղեցւոյ հոգեւոր հովիւ Տ. Յուսիկ քհնյ. Սարգսեանը։ Միութեան նախկին վարչական խորհուրդի անդամներ Տէր Հօր հետ միասին ներկայացուցին անցեալ մէկ տարուայ բարոյական հաշուետուութիւնը, ըստ որու՝ 2016 Մայիսէ  - 2017 Մայիս երիտասարդաց միութեան կողմէ կեանքի կոչուած են կրթական, մշակութային եւ բարեսիրական ծրագիրներ, որոնց շարքին Սուրբ Գիրքի սերտողութիւններ  եւ այլազան քննարկումներ, մասնակցութիւն Կանթեղ ամսաթերթիկի եւ կայքէջի պատրաստութեան, ուխտագնացութիւններ դէպի Սան Միշել, Լուրդ, 3 ֆիլմի ցուցադրութիւն, գեղարուեստական երեկոյ և ճաշկերոյթներ։ Կազմակերպուած են նաեւ դրամահաւաքներ Հայաստանի կարիքաւոր ընտանիքներու եւ բուժման մէջ գտնուող զինուորներու համար։ Փոքրիկ հաշուետուութեամբ ներկայացուեցաւ նաեւ միութեան ֆինանսական կացութիւնէ, որ կը գոյանայ անդամավճարներու, առատաձեռն անձանց նուիրատուութիւններու եւ կազմակերպուած միջոցառումներու շնորհիւ։


Հաշուետուութենէն ետք տեղի ունեցավ 2017-2018 թուականի նոր վարչութեան անդամներու ընտրութիւնը։ 13 թեկնածուներէն ձայներու առաւելութեամբ ընտրուեցան 7 նոր պատասխանատուներ`
Հուրի Ասատուրեան - ատենապետ
Բոգդան Առաքելեան - փոխատենապետ
Արմէնուհի Եգանեան եւ Փօլին Զուլիկեան - գանձապահներ
Հռիփսիմէ Չադրեան եւ Ամալի Գալստեան - քարտուղարներ
Արազ Կարպուշեան - անդամ երիտասարդաց վարչութեան



Ժողովի աւարտին միութեան երիտասարդներ նորընտիր վարչութեան հետ միասին յստակացուցին յառաջիկայ տարուայ  գործունէութեան դաշտը, յատուկ շեշտ դնելով միութեան 10ամեակի միջոցառումներու կազմակերպութեան վրայ։ Այդ մասին մանրամասն մեր ընթերցողներուն կը ծանուցուի առանձին նիւթով։




Ջերմօրէն կը շնորհաւորենք երիտասարդաց միութիւնը եւ նորընտիր մեր անդամներուն եւ կը մաղթենք անխոչընդոտ յառաջընթաց ի սէր մեր Տիրոջ Յիսուս Քրիստոսի  եւ Առաքելական մեր Սուրբ Եկեղեցւոյ։

Related Posts Plugin for WordPress, Blogger...