Recevoir les nouveaux articles par Email

mercredi 1 mars 2017

ՎԱՐԴԱՆԱՆՑ ՏՕՆԸ ՓԱՐԻԶԻ ՄԷՋ

Հայոց ազգային և հոգևոր մեծագոյն տօներէն է Վարդանանց տօնը՝ ձօնուած սպարապետ Վարդան Մամիկոնեանի եւ 1036 նահատակներու «իմացեալ» քաջագործութեան: Հայ ժողովուրդի, հայկական քրիստոնէութեան և առհասարակ հայոց ինքնութեան գոյութիւնը այդ 451 թուականի Աւարայրի ճակատամարտէն կախեալ էր, որու յաղթանակը եղաւ հայու անկոտրուն ոգին, որ կը փայլատակէ ցայսօր:

Նկատած ենք, սակայն, որ մեծ կարեւորութեան այս տօնի արժէքը օրըստօրէ կը նուազի սիրեցեալ մեր հայորդիներու գիտակցութեան մէջ: Այս կը վկայեն Վարդանանց տօնի պատարագներուն հաւատացելոց փոքրաթիւ ներկայութիւնը, ազգային տօնախմբութիւններու բացակայութիւնը, մամուլի եւ առհասարակ տեղեկատուական դաշտի լռութիւնը հայի եւ Աւարայրի մասին: Ակամայ կը գտնուինք իրականութեան մը առջեւ, ուր կամ պէտք է խոստովանիլ, որ մեր դարու Աւարայրին մենք՝ եկեղեցական թէ աշխարհական, պարտուեցանք կամ թէ պարտինք «սուր եւ խաչ» ձեռքերնիս առած «զարնել եւ զարնուիլ»:

Այս տարի Առաջնորդական տնօրինութեամբ Փարիզի Մայր Տաճարի մէջ Վարդանանց տօնի Ս. Պատարագը մատուցուեցաւ երեկոյեան ժամը 18-ին, հնարաւորութիւն ընձեռելով բարեպաշտ մեր հաւատացեալներուն աշխատանքէն եւ դպրոցէն վերջ մասնակցութիւն բերելու այս կարեւոր տօնախմբութեան: Եւ իրապէս նպատակը արդարացաւ հաւատացելոց բազմանդամ ներկայութեամբ: Պատարագիչն էր Հոգեշնորհ Տ. Ժիրայր Ծ. Վրդ. Թաշճեանը:
Պատարագի աւարտին հանդիսապետութեամբ թեմիս բարեխնամ առաջնորդ Գերշ. Տ. Վահան Եպս. Յովհաննէսեանի հոգեւորականաց դասը կատարեց «Կարգ Հայրապետական մաղթանաց»՝ աղօթելով Սուրբ Էջմիածնի անսասանութեան եւ անոր գահակալի՝ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի քաջառողջ հովուապետութեան համար:

Վարդանանցի ազգային ոգին առաւել ընդգծելու նպատակով, Պատարագէն վերջ Նուրհան Ֆրէնկեան սրահին մէջ տեղի ունեցաւ հանդիսութիւն, որուն (ինչպէս եւ Պատարագին) ներկայութիւն բերած էին Արցախի ազատամարտին մասնակցած ռազմիկներ՝ նախագահութեամբ Տիար Ռուբիկ Գալստանեանի եւ անցեալ տարուայ Ապրիլին Արցախի քառօրեայ պատերազմի մասնակից զինուորական Արման Աւետիսեանը:

Ներկաներուն ողջոյնի խօսք ըսաւ Մայր Տաճարի Հոգեւոր Հովիւ Տ. Յուսիկ Քհնյ. Սարգսեան, որու հրաւէրով Վարդանանց տօնի շուրջ իրենց ապրումները կիսեցին հրաւիրեալ զինուորականները, որմէ ետք օրուայ խորհուրդի եւ տօնի կարեւորութեան մասին խօսքով հանդէս եկաւ Գերաշնորհ Տ. Վահան Սրբազանը: Այնուհետեւ ներկաներ վայելեցին Հայաստանի մէջ վերջերս լոյս տեսած «ԿԵԱՆՔ եւ ԿՌԻՒ» գեղարուեստական ֆիլմը՝ նուիրուած Արցախեան պատերազմի որոշ դրուագներուն:
Related Posts Plugin for WordPress, Blogger...