Recevoir les nouveaux articles par Email

mercredi 18 janvier 2017

«ՄԱՆՈՒԿՆԵ՛Ր, ՕՐՀՆԵՑԷ՛Ք ԱՆՈՒՆԸ ՏԻՐՈՋ» (ՍԱՂՄ. 148:12)

Դաւիթ մարգարէի սաղմոսի այս տողի իրականացումի ականատեսները եղանք Փարիզի Հայկական եկեղեցւոյ մէջ Դեկտեմբեր 14-ին եւ 18-ին: Այս տարուան վերջին հանդիպումն ունեցան մանուկներու քրիստոնէական դաստիարակութեան «ՄԱՆԿՈՒՆՔ» դասընթացքի աշակերտները: Օրուայ նիւթը Քրիստոսի Սուրբ Ծնունդն էր իր գունագեղ պատմութեամբ ու այս տօնի հայկական առանձնայատկութիւնները: Իրենց մշտական ուշիմ եւ աշխատասէր ներկայութեան համար աշակերտները պարգեւատրուեցան Կաղանդ Պապայի Ամանորի նուէրներով՝ Աստուածաշունչով եւ Քրիստոսի մսուրի խաղով:

Դեկտեմբեր 18-ին ամավերջի հանդէսով ներկայացան Կիրակնօրեայ դպրոցի սաները՝ բոլորը ուրախցնելով իրենց սորված աղօթքներով, բանաստեղծութիւններով եւ երգերով: Անշուշտ սպասելի էր Կաղանդ Պապուկը, որ ժամանեց նուէրներու տոպրակներով եւ անակնկալներով: Ուրախ ցերեկոյթի աւարտին իր շնորհաւորանքի խօսքը ուղղեց Հոգեւոր Հովիւ Տէր Յուսիկ Քհնյ. Սարգսեանը, շնորհակալութիւն յայտնելով պզտիկներուն, անոնց ծնողներուն, ջանադիր ուսուցիչներուն եւ Տիկնանց Յանձնախումբի անդամուհիներուն, որոնց հոգածութեան ներքոյ կը գործէ Կիրակնօրեայ դպրոցը:

Մեծագոյն երջանկութիւն է Փարիզի Մայր եկեղեցին լեցուն տեսնել մանուկներով, որոնք սաղմոսի տողերով Տիրոջ անունը կ՚օրհնեն: «Մանկունք» դասընթացքը կը վերսկսի Չորեքշաբթի 11 Յունուար 2017-ին, իսկ Կիրակնօրեայ դպրոցը՝ Կիրակի 15 Յունուարին։ Կը սպասենք որ ձեզի հետ բերէք նաեւ նոր աշակերտաշարկերտուհիներ, որպէսզի խումբերը մեծնան եւ դասերը աւելի ճոխ ըլլան։
Related Posts Plugin for WordPress, Blogger...