Recevoir les nouveaux articles par Email

lundi 25 juillet 2016

ԵՐԻՏԱՍԱՐԴԱԿԱՆ...

Փարիզի «Ս. Յովհաննէս Մկրտիչ» Երիտասարդաց Միութիւնը, հակառակ ամառուան արձակուրդային շրջանին կը շարունակէ իր աշխոյժ գործունէութիւնը:

Մինչեւ Սեպտեմբեր ամիս, ինչպէս արդէն յայտարարած էինք, կ՚ընթանայ «ՄԻԱՍԻՆ ՔՆՆԱՐԿԵՆՔ» զրոյցներու շարքը, որու ընթացքին քննարկումը հոգեւորականներէն զատ կը կատարեն նաեւ աշխարհական անձինք՝ կիսելով իրենց մասնագիտական փորձառութիւնը: Յուլիսի սկիզբը նման հետաքրքրական քննարկում մը տեղի ունեցաւ՝ բանախօսութեամբ ՀՀ դեսպանատան աշխատակից, միջազգային իրաւունքի մասնագէտ Տիար Տիգրան Գալստեանի: Քննարկման նիւթն էր՝ «ԿՐՕՆՔ ԵՒ ՊԵՏՈՒԹԻՒՆ. ՊԱՏՄՈՒԹԻՒՆԸ ԵՒ ՆԵՐԿԱՆ»: Երեկոն անցաւ հետաքրքրական եւ աշխոյժ քննարկումի մթնոլորտի մէջ:

Մեր Միութիւնը հոգեւոր զարգացումին առընթեր միշտ կարեւոր կը նկատէ նաեւ երիտասարդական ժամանցները, որուն որպէս արդիւնք շուրջ 30 երիտասարդներ Տ. Յուսիկ Քհնյ. Սարգսեանի հետ միասին Յունիս 4-ին համախմբուած էին մարզական խաղի շուրջ. բոուլինգի մրցաշարը ընթացաւ ընկերային մթնոլորտի մէջ: Լաւագոյնները այս անգամ տղաներն էին՝ Էդգարը, Ժորժը եւ Բոգդանը:

Մարզական նոր նախաձեռնութիւն մըն ալ այս ամառ մեկնարկ առած է: Պարուհի Անուշիկ Մանուկեանի հետ միասին ամէն ուրբաթ երիտասարդ-երիտասարդուհիները քննարկումներէն առաջ եկեղեցւոյ սրահի մէջ կը սորվին հայկական ժողովրդական եւ ազգագրական պարեր՝ առողջ մարմնի մէջ դաստիարակելով նաեւ առողջ հայկական ոգին:

Արդէն աւանդութիւն դարձած է տարին քանի մը անգամ, յատկապէս Տաղաւար Տօներէն առաջ կազմակերպել մեր շատ սիրելի եկեղեցւոյ մաքրութիւնը: Յիսուսի Պայծառակերպութեան տօնին ընդառաջ շուրջ երեք տասնեակ երիտասարդներ համախմբուած էին օրհնաբեր այս ծառայութիւնը մատուցելու: Աստուած թող առատօրէն օրհնէ փարիզաբնակ մեր երիտասարդները եւ առատացնէ անոնց շնորհները, հաւատքը եւ կորովը:
http://www.jeaap.net/2016/07/la-jeunesse.html
Related Posts Plugin for WordPress, Blogger...