Recevoir les nouveaux articles par Email

mardi 7 juin 2016

ԲԱՐԵԳՈՐԾԱԿԱՆ ՀԱՄԵՐԳ Ի ՆՊԱՍՏ ԱՐՑԱԽԻ

Ապրիլ ամսուայ ընթացքին ողջ աշխարհի եւ համայն հայութեան հայեացքները ուղղուած էին ամսուայ սկիզբը հայ-ատրպէյճանական սահմանին սկսած պատերազմին: Թուրք քոչուորներու անակնկալ սադրանքին հայկական ուժերը արժանի հակահարուած տուին, սակայն պատերազմի յատուկ կորուստներէն կարելի չեղաւ խուսափիլ...

Աշխարհի բոլոր ծայրերէն հայութիւնը մէկ բռունցք դարձաւ իր աջակցութիւնը Արցախ աշխարհին հասցնելու համար: Ֆրանսայի թեմի առաջնորդ Տ. Վահան Եպս. Յովհաննէսեանի օրհնութեամբ դրամահաւաքի նախաձեռնեցին նաեւ թեմի հայկական եկեղեցիները: Առաջնորդանիստ մայր տաճարը Մայիս 8-ին՝ Շուշիի ազատագրումի 24-ամեակի տօնական առիթով կազմակերպեց նաեւ ազգային-հայրենասիրական երգերու համերգ մը «ԱԶԱՏ ԱՐՑԱԽ» վերտառութեամբ, մասնակցութեամբ Հայաստանէն ժամանած «Արմէններ» երիտասարդական խումբի, ղեկավարութեամբ Տիար Սամուէլ Գալստեանի: Խումբը իր ժամանումի օրը՝ Մայիս 4-ին, փոքրիկ յայտագրով հանդէս եկաւ նաեւ Թեմական ճաշկերոյթին, որ կազմակերպուած էր ի պատիւ Սրբազան Հօր քահանայագործութեան 25-րդ տարեդարձին: Իսկ Մայիս 8-ին՝ Ս. Պատարագէն վերջ շուրջ 100 հայորդիներ համախմբուած էին Մայր Եկեղեցւոյ Նուրհան Ֆրէնկեան սրահի մէջ, ուր կը հնչէին սիրոյ եւ յաղթութեան երգեր եւ ներկայ երիտասարդները մեծ ոգեւորութեամբ շուրջպար բռնած էին՝ ի ցոյց դնելով հայու անկոտրում ոգին: Հայկական գեղեցիկ պարերու կատարումով համերգը զարդարեց նաեւ տաղանդաւոր պարուհի Անուշիկ Մանուկեանը: Շուրջ 2 ժամ տեւած համերգի որպէս արդիւնք հաւաքուեցաւ 1570 եւրօ, որ փոխանցուեցաւ Թեմական բարեգործական հաշուեկշիռին: Այս եւ թեմի միւս եկեղեցիներէն հաւաքուած գումարները՝ շուրջ 25.000 եւրօ փոխանցուեցան Մայր Աթոռ Սուրբ Էջմիածին՝ աշխարհասփիւռ մեր թեմերէն հաւաքուած դրամական օգնութիւններու հետ միասին ծառայելու Արցախի Հանրապետութեանը, Զինուած ուժերուն, պատերազմական գօտիի տուժած բնակիչներուն եւ զինուորականներուն: Թող Աստուած օրհնէ Հայաստան եւ Արցախ աշխարհը եւ լիութեամբ հատուցէ բոլոր անոնց, որոնք իրենց փոքր կամ մեծ լուման կը ներդնեն հայրենաշէն գործի համար:



Համերգի կազմակերպութեան համար մեր յատուկ շնորհակալութիւնները կ՚ուզենք յայտնել՝


Թեմիս բարեխնամ առաջնորդ Գերշ. Տ. Վահան Եպս. Յովհաննէսեանին,
Համերգը նախաձեռնող Աննա Մաճկալեանին,
Երգիչներ՝ Սամուէլ Գալստեանին, Լիլիթ Եղիազարեանին, Ռուբէն Աւագեանին,
Պարուհի Անուշիկ Մանուկեանին,
Երաժիշտներ Յովհաննէս Ասատրեանին եւ Արթիւր Լպուտեանին,
Փարիզի Մայր Եկեղեցւոյ Ծխական խորհուրդին եւ Երիտասարդաց միութեան:

Ստորեւ՝ քանի մը անդրադարձներ համերգին եւ Հայաստանի Հանրային հեռուստաընկերութեան անդրադարձը՝




 Տ. Յուսիկ քհնյ. Սարգսեան
http://www.jeaap.net/2016/06/concert-caritatif-pour-lartsakh.html
Related Posts Plugin for WordPress, Blogger...