Recevoir les nouveaux articles par Email

mercredi 30 mars 2016

ՔՐԻՍՏՈՍԻ ՅԱՐՈՒԹԵԱՆ ԱՒԵՏԻՍԸ ՄԵՐ ՏՈՒՆԵՐՈՒՆ ՄԷՋ

Եկեղեցւոյ Սուրբ Հայրերը կ՚ըսեն, որ քրիստոնեայի օջախը, անոր տունը փոքրիկ եկեղեցի մըն է: Ինչպէս եկեղեցիի մէջ կը յարատեւեն խաղաղութիւնը, մաքրութիւնը, աղօթքը եւ սէրը, ճիշտ այդպէս ալ քրիստոնէական իւրաքանչիւր օջախ, իւրաքանչիւր տուն պէտք է լեցուի Աստուածային խաղաղութեամբ, մաքրութեամբ, աղօթքով ու սիրով: Ասոր նպաստող ամենէն կարեւոր պայմաններն են մարդու ներքին քրիստոնէական կեանքը եւ սրբութեան ձգտումը, ինչպէս նաեւ Աւետարանի ու Եկեղեցւոյ հռչակած սրբարար սկզբունքներու համաձայն ապրիլը: Այդօրինակ սկզբունքներէն մէկն է Տնօրհնէքներու աւանդութիւնը, որ Հայաստանեայց Առաքելական Սուրբ Եկեղեցւոյ մէջ տարեկան երկու անգամ կը կատարուի հայկական օջախներու մէջ՝ մէկը Սուրբ Ծնունդէն եւ միւսը Սուրբ Յարութեան տօնէն ետքը: Գեղեցիկ այս արարողակարգը կը կարեւորուի քանի մը առանձնայատկութիւններով: Նախ տնօրհնէքի միջոցով Քրիստոսի հրաշափառ Յարութեան լոյսը, յոյսը եւ փրկութեան աւետիսը կը բերուի հայորդիներու ընտանեկան օջախներ: Տնօրհնէքի ընթացքին աղօթք կը հնչէ ընտանիքի իւրաքանչիւր անդամի համար եւ ամէնքը կ'օրհնուին փրկչական խաչի նշանով: Կ'օրհնուին եւ կը ճաշակուին նաեւ ընտանեկան ամենէն կարեւոր բարիքները` հացը, ջուրն ու աղը: Տնօրհնէքի արարողութեան միջոցաւ Աստուած իր աներեւոյթ ներկայութեամբ կը սրբէ ընտանեկան յարկը` զայն լեցնելով իր խաղաղութեամբ, սիրով, ջերմութեամբ եւ շնորհներով:

Ուստի Տնօրհնէքը ոչ միայն սոսկ աւանդութիւն մըն է, այլ Աստուծոյ օրհնութիւնը մեր օջախներ բերելու, մեր տուները փոքրիկ եկեղեցիներու վերածելու, սրբուելու եւ Տիրոջ լոյսով լուսավառուելու հիանալի առիթ է: Հետեւաբար կը յորդորենք Փարիզաբնակ մեր հաւատացեալները նախանձախնդիր ըլլալ կարեւոր այս աւանդութիւնը պահպանելու հարցին մէջ եւ հրաւիրել սեփական ծուխի հոգեւորականները իրենց տուները՝ Քրիստոսի Յարութեան աւետիսը Տնօրհնէքով, հոգիի ու սրտի ուրախութեամբ իրենց հռչակելու՝


ՔՐԻՍՏՈՍ ՅԱՐԵԱՒ Ի ՄԵՌԵԼՈՑ ՕՐՀՆԵԱԼ Է ՅԱՐՈՒԹԻՒՆԸ ՔՐԻՍՏՈՍԻ

Եթէ կը ցանկաք օրհնել ձեր յարկաբաժինը կամ տունը, հաճեցէք կապ հաստատել Տէր Յուսիկ քհնյ. Սարգսեանի հետ կամ զանգահարել եկեղեցւոյ գրասենյակ:




Related Posts Plugin for WordPress, Blogger...