Recevoir les nouveaux articles par Email

mercredi 24 février 2016

ՓԵՏՐՈՒԱՐԻ ԱՌԱՋԻՆ ՇԱԲԱԹԸ

Այս տարի Փետրուար ամսուան առաջին շաբաթը չափազանց հագեցած էր. անցնող 7 օրերուն ընթացքին ուշագրաւ քանի մը իրադարձութիւններ տեղի ունեցան:
Ա. Թեմիս բարեխնամ Առաջնորդի՝ Տ. Վահան Եպս. Յովհաննէսեանի օրհնութեամբ եւ նախաձեռնութեամբ Փետրուար 1-2 Գրենոբլ քաղաքի մէջ տեղի ունեցաւ Ֆրանսահայոց թեմի քահանայից համաժողով: Առիթը, անշուշտ, Ղեւոնդեանց քահանաներու տօնն էր, որ աւանդաբար բոլոր քահանաներու տօն կը նկատուի: Այդ առթիւ Գրենոբլի ծուխի եւ հոգեւոր հովիւ Տ. Բաբկէն քհնյ, Ստեփանեանի ջերմ հիւրընկալութեամբ քահանայ հայրերը Առաջնորդին գլխաւորութեամբ միասնական աղօթքի եւ քննարկումներու հիանալի առիթ ունեցան:

Բ. Փետրուար 4-ը այս տարի Վարդանանց քաջերու տօնակատարութեան  օրն էր: Ինչպէս
ամէն տարի, այս տարի եւս Մայր Տաճարի մէջ Պատարագ մատուցուեցաւ տօնին առթիւ: Պատարագիչն էր Հոլանտայի Ալմելօ քաղաքի հովիւ Տ. Մաշտոց քհնյ. Բաղդասարեանը, որ Ամստերդամի հովիւ Տ. Տարօն քհնյ. Թադէոսեանի հետ հիւրաբար կը գտնուէր Փարիզ: Քանի, որ Վարդանանց տօնը Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի անուանակոչութեան օրն է, ինչպէս Հայաստանեայց բոլոր եկեղեցիներու մէջ, Սբ. Յովհ. Մկրտիչ Մայր Տաճարի մէջ եւս կատարուեցաւ Հայրապետական մաղթանք Առաջնորդ Հօր հանդիասապետութեամբ:


Գ. Փետրուար 6-ը եւս նշանաւոր օր էր: Լիոն քաղաքին մէջ կը գումարուէր համաֆրանսական եկեղեցասէր երիտասարդներու ժողով-հաւաքը, որուն Փարիզի Մայր Տաճարի երիտասարդաց միութիւնը մասնակցեցաւ 12  երիտասարդներով՝ առաջնորդութեամբ Տ. Յուսիկ քհնյ. Սարգսեանի: Յագեցած՝ օրը աւարտեցաւ թեմականներու երիտասարդական վարչական խորհուրդի ընտրութեամբ. Ուրախութիւն մեզի, մեր միութեան  ատենապետ Գոռ Հախվերդեան վերընտրուեցաւ որպէս երիտասարդական վարչութեան անդամ: Օրուան աւարտին Մարսէյի երիտասարդներու եւ Սբ. Թարգմանչաց մայր եկեղեցւոյ հովիւ Տ. Արամ քհնյ. Ղազարեանի հետ մինչեւ իսկ Լիոնի յայտնի Տաճարը հասցուցինք այցելել:

Դ. Փետրուար 7-ը արդէն Բուն Բարեկենդան էր: Մեծ Պահոց շրջանին սկիզբ տրուեցաւ: Օրուան  պատարագիչը  Տ. Ժիրայր Ծ. Վրդ. Թաշճեանն էր: Այդ օրը՝ սիրելի Հայր Ժիրայրին համար նշանաւոր օր մըն էր, քանի, որ Մայր Եկեղեցւոյ մէջ Առաջնորդ Սրբազանի օրհնութեամբ կը տօնուէին Հայր Սուրբի Ծննդեան 80-րդ եւ քահանայագործութեան 55-րդ տարեդարձները: Իր կեանքին 30 եւ աւելի տարիները Հայր Սուրբը նուիրած է Փարիզահայ համայնքի ծառայութեան ՝ մինչեւ այսօր շարունակելով իր ազնիւ ծառայութիւնը Մայր Տաճարի գրադարանին մէջ: Ի պատիւ Հայր Ժիրայրին՝ նոյն օրը Ծխական խորհուրդի եւ Տիկնանց միութեան կազմակերպութեամբ եկեղեցւոյ սրահին մէջ տեղի ունեցաւ հիւրասիրութեան երեկոյթ:
Related Posts Plugin for WordPress, Blogger...