Recevoir les nouveaux articles par Email

mercredi 20 janvier 2016

ՏՕՆ ՍԲ ՍԱՐԳԻՍ ԶՕՐԱՎԱՐԻ

Ամէն տարի Հայոց Եկեղեցին կը տօնախմբէ հայոց ամենէն սիրելի տօներէն մէկը՝ Սուրբ Սարգիսը: Այս տօնին հանդէպ մեր ժողովուրդի ունեցած սիրոյ լաւագոյն արտայայտութիւններն են Սբ. Սարգիս զօրավարի մասին բազմաթիւ պատմութիւններն ու տօնին հետ առնչուած ժողովրդական սովորութիւնները:  Դ դարուն ապրած այս քրիստոնեայ զօրավարը, հռչակուած ըլլալով որպէս ազնիւ եւ քաջ զօրական, Հռոմի Մեծն Կոստանդիանոս կայսեր կողմէ կը կարգուի որպէս իշխան եւ սպարապետ Կապադովկիոյ: Որպէս նուիրեալ քրիստոնեայ՝ ան, օգտուելով կայսեր համաձայնութենէն, իր իշխանութեան տակ գտնուող քաղաքներուն մէջ կը քանդէ հեթանոսական մեհեաններ եւ կը կառուցէ եկեղեցիներ, հետամուտ կ'ըլլայ նոր քահանաներու կարգման եւ քրիստոնէական հաւատքի տարածման: Շուտով Սարգիս զօրավար աստուածային յայտնութեամբ հրաման կ'առնէ հեռանալու կայսրութենէն եւ իր որդւոյն՝ Մարտիրոսի հետ կ'երթայ եւ բնակութիւն կը հաստատէ քրիստոնեայ Հայաստանի մէջ, ապա ծառայութեան կ՚անցնի պարսից Շապուհ արքայի մօտ՝ որպէս զօրագունդերու հրամանատար: Պարսից զօրականներէն շատ ու շատեր, տեսնելով Սարգիսի բարեպաշտութիւնը եւ նուիրումը առ Աստուած, եւ հրաշքները որ անոր աղօթքներով կը գործէր Տէրը, կը հրաժարին կրակապաշտ հեթանոսութենէն եւ կ'ընդունին քրիստոնէութիւնը: Այս իմանալով Շապուհ շատ կը զայրանայ եւ կը պահանջէ Սարգիսէն ու իր զինակից քրիստոնեաներէն պաշտել կրակը եւ զոհ մատուցել չաստուածներուն: Քաջ զօրավարը իսպառ կը մերժէ և զայրացած հեթանոս ամբոխը կը յարձակի Սուրբին եւ անոր որդիին վրայ ու կը նահատակուի  Մարտիրոսը: Սբ. Սարգիս կը բանտարկուի եւ մինչեւ վերջ չուրանալով զԱստուած՝ ի վերջոյ կը գլխատուի: Քրիստոնէական հաւատքի համար կը նահատակուին նաեւ Սբ. Սարգիսի հաւատարիմ տասնչորս զինուորները: Քանի մը տարի ետք սուրբի մասունքները Սբ. Մեսրոպ Մաշտոց վարդապետի կողմէ կը բերուին Հայաստան՝ Կարբի (Ուշի) եւ թաղման տեղը կը կառուցուի երանելիի անունը կրող եկեղեցի: Այս է Սբ Սարգիսի կեանքի եւ նահատակութեան պատմութիւնը:


Սարգիս զօրավարի տօնը հայոց մէջ ընդունուած է նշել ոչ միայն պատարագով եւ աղօթքով, այլեւ ժողովրդական սովորութիւններով, որոնք գեղեցիկ ու նուիրական աւանդութեան վերածուած են: Ժողովրդական աւանդազրոյցներու եւ բանահիւսութեան մէջ Սբ. Սարգիս զօրավարը կը ներկայանայ որպէս երիտասարդներու եւ սիրահարներու արագահաս բարեխօս: Այս պատճառով շատ մեծ է երիտասարդներուն նուիրումը այս տօնին: Տօնի օրը երիտասարդները կ'աղօթեն՝ հայցելով, որ  Սբ. Սարգիս իրենց աղօթքները հասցնէ առ Աստուած եւ կամօքն Աստուծոյ իրականացնէ իրենց սիրոյ երազանքը:
Ամենայն Հայոց Գարեգին Բ. Հայրապետի բարձր տնօրինութեամբ Սբ. Սարգիս զօրավարի տօնը հռչակուած է «Երիտասարդներու օրհնութեան օր» եւ օրհնութեան յատուկ կարգ կը կատարուի Հայ Առաքելական բոլոր եկեղեցիներուն մէջ: Այս տարի Սբ. Սարգիսի տօնը Յունուար 11-ին է:

http://www.jeaap.net/2016/01/fete-de-saint-sarkis.html
Related Posts Plugin for WordPress, Blogger...