Recevoir les nouveaux articles par Email

samedi 2 janvier 2016

ՏԱՐԵՍԿԻԶԲԻ ՏՕՆԱԿԱՏԱՐՈՒԹԻՒՆՆԵՐ

Յունուար ամիսը բաւական հարուստ է ծիսական-եկեղեցական տօնակատարութիւններով, որոնք համառօտակի կը ներկայացնենք ստորեւ՝

Ճրագալոյցի պատարագ – Ճրագալոյց կը նշանակէ ճրագները վառել: Յունուար 5-ի երեկոյեան է որ կը սկսին Ս. Ծննդեան տօնակատարութիւնները: Երեկոյեան կամ կէսգիշերին մօտ ըլլալու պատճառաւ հին ժամանակ ժողովուրդը ճրագները վառած կը կենար այս Պատարագներուն: Մինչեւ այսօր բարեպաշտական սովորութիւն կայ նաեւ Ճրագալոյցի պատարագէն վերջ վառած ճրագ մը կամ մոմ մը տուն տանելու՝ որպէս նշան Քրիստոսի ծննդեամբ աշխարհի վրայ իջած փրկութեան լոյսի: Փարիզի Մայր եկեղեցին Ճրագալոյցի ծիսակատարութիւնները կը սկսի Յունուար 5-ին ժամը 16:00-ին:
Յիշեցնենք, որ Մայր Տաճարի Տիկնանց Յանձնախումբի նախաձեռնութեամբ Ս. Ծննդեան Սիրոյ ճաշ կազմակերպուած է եկեղեցւոյ սրահին մէջ ժամը 19:30-ին:
Ս. Ծննդեան Պատարագ – Ս. Ծննդեան հանդիսաւոր պատարագը տեղի կ՚ունենայ Յունուար 6-ին ժամը 10:30-ին: Պիտի պատարագէ եւ Առաջնորդական իր պատգամը փոխանցէ Ֆրանսահայոց Թեմի Բարե-խնամ առաջնորդ Գերշ. Տ. Վահան Եպս. Յովհան-նէսեան: Պատարագի աւարտին, որպէս Քրիստոսի Աստուածայայտնութեան եւ Մկրտութեան խորհուրդ կը կատարուի Ջրօրհնէքի կարգ: Միւռոնով հեղուած ջուրը կը բաշխուի հաւատաւոր մեր ժողովուրդին:
Մեռելոց Պատարագ – Հայոց Եկեղեցւոյ աւանդութեան համաձայն Տաղաւար տօներու յաջորդող օրը Մեռելոց յիշատակութեան օր է, որու առթիւ կը մատուցուի պատարագ: Սուրբ Ծնունդը տարուան առաջին տաղաւարն է, ուստի Յունուար 7-ին, ժամը 10:30-ին Մայր Եկեղեցւոյ մէջ կը մատուցուի Պատարագ, որու աւարտին՝ Հոգեհանգիստ վասն համօրէն ննջեցելոց (հաճեցէք կանուխէն արձանագրել ձեր ընտանեաց ննջեցեալներու անունները): Յաճախ մեր ժողովուրդի մօտ մեռելոցի օրերը կը նկատուին որպէս սուգի օրեր, սակայն հարկ է նկատել, որ Սուրբ Ծնունդը կը տօնուի 8 օր շարունակ՝ մինչեւ Յունուար 13, հետեւաբար Յունուար 7-ը տակաւին տօնական օր է: Իսկ մեռելոցի նպատակն է Քրիստոսի Ծննդեան բերկրանքը կիսել մեր նախնիներու, ննջեցեալ հարազատներու եւ բարեկամներու հետ, անոնց համար աղօթելով եւ անոնց փոխանցելով Քրիստոսի Ծննդեան աւետիսը:
Անուանակոչութեան Պատարագ Յունուար 13-ին Հայաստանեայց Եկեղեցին անշարժօրէն կը տօնէ Տէր Յիսուս Քրիստոսի Անուանակոչութեան եւ թլփատութեան տօնը, որու առթիւ կը մատուցուի Պատարագ: Պատարագի աւարտին ընկալեալ սովորութեամբ կը կատարուի Թեմիս Առաջնորդարանի տնօրհնէքի արարողութիւնը:

http://www.jeaap.net/2015/12/celebrations-de-ce-debut-dannee.html
Related Posts Plugin for WordPress, Blogger...