Recevoir les nouveaux articles par Email

mercredi 9 septembre 2015

ՏՕՆ ԽԱՉՎԵՐԱՑԻ

Հայ Եկեղեցւոյ հինգ Տաղաւար տօներէն վերջինը տարուան մէջ Խաչվերացն է՝ Սուրբ Խաչի Տօնը: Այս տօնը Խաչին նուիրուած չորս տօներուն մէջ ամենակարևորն է, որովհետև նուիրուած է օտար գերութենէն խաչի վերադարձի, անոր բարձրացման և փառաբանութեան պատմական յիշատակին:
610 թ. պարսից Խոսրով արքան մեծաքանակ զօրքով կը յարձակի Բիւզանդական կայսրութեան վրայ: Սկզբնական յաջողութիւններէն ոգևորուած՝ պարսկական զօրքերը 614 թ. կը մտնեն եւ կը գրաւեն Երուսաղէմը: Կռապաշտ պարսիկները կը մտնեն Ս. Յարութեան տաճար և գերի կը վերցնեն այնտեղ պահուող Աստուածընկալ Ս. Խաչը, որու վրայ խաչուած էր Տէր Յիսուս Քրիստոս: Խաչի այս մասունքը Դ դարու սկիզբը Կոստանդիանոս կայսեր մօր՝ Հեղինէի ձեռքով գտնուեր և պաշտամունքի առարկայ էր դարձել բոլոր քրիստոնեաներու համար:

628 թ. բիւզանդական զօրքերը Հերակլ կայսեր գլխաւորութեամբ խաչափայտը վերադարձնելու համար կը պատերազմին պարսիկներու դէմ: Բիւզանդական զօրքին կ’օժանդակէ նաև հայկական զօրախումբը Մժեժ Գնունիի գլխաւորութեամբ: Տիրոջ օգնութեամբ բիւզանդացիները յաղթանակ կը տանին: Ս. Խաչը հանդիսաւոր թափօրով կը տեղափոխուի հայոց Կարին քաղաքը: Իսկ Կարինէն զայն կը տեղափոխեն Կ. Պոլիս, ապա Երուսաղէմ: Գերեդարձի ճանապարհին Տիրոջ խաչափայտը բարձրացուելով ցնծութեան առիթ կ’ըլլար ժողովուրդի համար: Ահա այս պատճառով այս տօնը կ՚անուանենք Խաչվերաց՝ Խաչը վեր հանելու, փառաւորելու տօն:


Խաչը քրիստոնեաներու համար Աստուծոյ զօրութիւնն է ու պարծանքներու պարծանքը, որուն վրայ իր անմեղ արիւնը թափեց Քրիստոս՝ տալով մեզ յաղթութեան զէնքը՝ ընդդէմ սատանային ու անոր խաբկանքներուն: Յիսուս խաչի վրայ ցոյց տուաւ իր անհուն սէրը մարդկութեան հանդէպ, և խաչը դարձաւ մեզի համար յոյսի, սիրոյ և փրկութեան երաշխիք: Անոր վրայ թափուած սուրբ եւ մաքրամաքուր արիւնը եղաւ սրբութիւնն ու փրկութիւնը հանուր մարդկութեան:

Հայաստանեայց Եկեղեցին Խաչվերացը կը տօնէ Սեպտեմբեր14-ի ամենամօտիկ Կիրակին (այս տարի՝ Սեպտեմբեր 11): Ինչպէս միւս Տաղաւար տօներուն, Խաչվերացի յաջորդ օրը  մեռելոց յիշատակի օր է:
http://www.jeaap.net/2015/09/lexaltation-de-la-sainte-croix.html
Related Posts Plugin for WordPress, Blogger...