Recevoir les nouveaux articles par Email

mercredi 28 mai 2014

ԱՆՄՈՌԱՆԱԼԻ ՈՒԽՏԱԳՆԱՑՈՒԹԻՒՆ ԴԷՊԻ ՍՈՒՐԲ ԵՐԿԻՐ

Փարիզի Մայր Եկեղեցւոյ Տիկնանց Յանձնախումբի երկարամսեայ ջանադիր աշխատանքի շնորհիւ մեր օդանաւը Մայիս 23-ին վայրէջք կատարեց Իսրայէլի մայրաքաղաք Թել Աւիւ: Երեսուն հոգիէ բաղկացած ուխտաւորներուս խումբին կը սպասէր իննօրեայ հրաշալի ճամբորդութիւն` լեցուն հոգեւոր ապրումներով եւ պատմութեան հաղորդակից դառնալու հիացմունքով: Յաջորդ օրն իսկ ճամբայ ելանք դէպի Տիբերիա եւ Գալիլիա, վայրեր՝ ուր աստուածաշնչական պատմութիւնը, հրաշքը, իրականութիւնն ու հաւատքը կը  միահիւսուին իրարու: Քաղաքներն ու սուրբգրային վայրերը կը հետեւէին մէկը միւսին` Յոպպէ, Կեսարիա, Կանա, Նազարէթ, Թաբոր, Յորդանան, Բեթղեհէմ... Ճանապարհը կ'անցնի աղօթքով, երգերով եւ ուրախութեամբ: Ուխտաւորները բոլոր սրբավայրերուն մէջ կը նկարուին որպէս յիշատակ: Բոլոր սրբավայրերուն քով Տէր Հայրը կը կարդար Աստուածաշունչի համապատասխան հատուածը եւ մեկնաբանութիւններ կ՚ընէր: Որոշ տեղեր հաւատացեալ ուխտաւորներ իրենք աղօթական նախաձեռնութիւն կ'ունենային, ինչպէս՝ Տէր Ողորմեայի եւ Սուրբ Աստուածի խմբային կատարումները Պայծառակերպութեան եկեղեցւոյ մէջ: Հետաքրքրական է, որ Կանա քաղաքին մէջ, ուր Յիսուս ջուրը գինիի վերածելով օրհնած էր հարսանիք մը, ուխտաւորներ եւս օրհնութիւն ստացան. Տեր Յուսիկ քհն. Սարգսեան օրհնեց բոլոր ամուսնացած զոյգերը, սէր եւ խաղաղութիւն մաղթելով ընտանիքի մէջ, իսկ ամուրիներուն` սիրող կէսի ձեռբերում եւ Աստուածային օրհնութիւն:


Յորդանան գետի մօտ աղօթքէն ետք հաւատացեալներ լուացուեցան Տիրոջ Մկրտութեամբ սրբուած գետի հոսանքի մէջ, իսկ Քրիստոսի ծննդեան Բեթղեհէմ քաղաքին մէջ, ճիշտ ծննդեան այրին առջեւ մասնակիցը դարձան իւրաքանչիւր օր մատուցուող Հայկական Սուրբ Պատարագի:

Ամենէն սպասուածը սակայն տակաւին առջեւն էր` երեք կրօններու քաղաք Հին Երուսաղէմը`
Ան որ երբեւիցէ այցելած է քրիստոնէութեան այս գլխաւոր սրբատեղին, կը հաստատէ՝ որ Տաճարի պատերէն ներս աներեւակայելի զօրութիւն մը վեր կը հանէ մարդկային հոգին, կը յուզէ արցունքոտելու չափ, կը մաքրագործէ ու կը նորոգէ` խաղաղութիւն հաստատելով ներաշխարհի մէջ: Խաղաղութեան այս ապրումը կ'ունենանք յատկապէս, երբ Աստուծոյ հետ միայնակ կը մնանք գիշերային տաճարին մէջ: Ուխտաւորներէն փոքրիկ խումբ մը երջանկութիւնն ունեցաւ գիշերը աղօթքով անցընելու Սուրբ Գերեզմանին առջեւ, ապա կէսգիշերն անց Սուրբ եւ Անմահ Պատարագի մասնակցելու եւ հաղորդուելու այն վայրին մէջ, ուր Քրիստոս յարութիւն առած է: Յատուկ արտօնութեամբ պատարագիչն այդ գիշեր Փարիզի Հոգեւոր Հովիւ Տէր Յուսիկ քահանայ Սարգսեանն էր:
իր հազարամեայ անցեալով, քրիստոնէական անկրկնելի հարստութեամբ: Այս քաղաքին մէջ սրբատեղիները իրարու այնքան մօտ են եւ այնչափ զօրաւոր, որ երբեմն կը կարծես թէ ճիշտ Յիսուսի ժամանակներուն կ՚ապրիս եւ բիբլիական պատմութեան մասնակից ես: Ձիթենեաց լեռը` Գեթսեմանիի պարտէզով եւ Համբարձման լերան հետ (հոս բարէբախդութիւն ունեցանք նաեւ Համբարձման տօնին Պատարագի մասնակցելու եւ Տիրոջը հաղորդուելու),  Խաչի եւ Չարչարանքի ճանապարհը եւ վերջապէս` Տիրոջ Յարութեան Տաճարը` Սուրբ Գերեզման, Գողգոթա...

Երուսաղէմը հայերուս համար գրաւչութեան մէկ այլ մասնիկ եւս ունի: Ատիկա հայկական թաղամասն է, հայապատկան սրբատեղիներն ու իրաւունքները եւ Սրբոց Յակոբեանց միաբանութիւնը: Հակառակ որ դարեր շարունակ Հայկական Երուսաղէմը բիւր փորձութիւններու բովով անցած է` ճանապարհի ընթացքին մեծագոյն կորուտներ կրելով, այսօր այն չի դադրիր իր ուրոյն ու համաքրիստոնէական  դերը ունենալէ Երուսաղէմի կեանքի մէջ եւ հիացնելէ իր հարստութեամբ ու պատմական անցեալով թէ՛ հայերը եւ թէ՛ օտարները: Հայկական զինուորեալ միաբանութիւնը ամուր վահանի մը պէս կեցած է Երուսաղէմի մէջ` որպէս վկայութիւն հայոց դարաւոր պատմութեան եւ հայերուս անխախտ հաւատքի առ Փրկիչ Յիսուսը: Այս մասին մեր հիացմունքն ու շնորհակալութիւնը յայտնեցինք նաեւ Պատրիարք Հօր` Ամենապատիւ Տ. Նուրհան Արք. Մանուկեանին, որու հետ հանդիպելու բարեպատեհութիւնն ունեցանք ուխտագնացութեան վերջին օրերուն: Սրբազան Պատրիարքի հետ հանդիպումն անցաւ ջերմ մթնոլորտի մէջ. Պատրիարք Հօր իրենց ողջոյնի, շնորհակալութեան եւ պատրիարքական գահին բազմելու առթիւ շնորհաւորանքի խօսքերն ուղղեցին Տէր Յուսիկ քհն. Սարգսեանը, Տիկնանց յանձնախումբի ատենապետուհի Տիկ. Մարկօ Գոգորեանը, թեմական եւ ծխական ներկայացուցիչ ուխտաւորներ: Սրբազան Պատրիարքը իր հերթին շնորհաւորեց ուխտաւորներս, որ առիթ ունեցած ենք «մահտեսի» ըլլալու եւ նշեց, որ Երուսաղէմը ամէն հայու տունն է: Յաւարտ հանդիպումի ուխտաւորները օրհնութեան արժանացան Նուրհան Պատրիարքի կողմէ, լուսանկարուեցան եւ վայելումի վերջին ժամերն ունեցան Երուսաղէմի մէջ:
Ուխտագնացութիւնը երկրէն դէպի երկինք, մարդկայինէն դէպի աստուածային ձգտում եւ ընթացք մըն է, որու համար միջնորդ կը հանդիսանան սրբատեղիները, աղօթքը, խոկումը, ապաշխարութիւնը: Այս ամէնը իրապէս ապրեցանք 10 օրերու ընթացքին եւ առիթն ունինք ըսելու՝ Փառք Աստուծոյ: Վերստին շնորհակալութիւն եւ գոհութիւն Բարձրեալին հիանալի այս առիթը ընձեռելու եւ իր օրհնութեամբ մեզ պսակելու համար: Շնորհակալութիւն բոլոր կազմակերպիչներուն եւ մասնակիցներուն, որ ջանք չխնայեցին սիրով եւ աղօթքով ընթացք ունենալու համար:
Աստուծոյ կամքով՝ պիտի հանդիպինք յաջորդ ուխտագնացութեան համար: Տէրը պահապան բոլորիս:


http://jeaapblog.blogspot.fr/2014/05/un-pelerinage-inoubliable-en-terre.html
Related Posts Plugin for WordPress, Blogger...